Si Nona Manis

Gohu VS Sate Ba' Manado

Gohu ato Sate Ba Rica....
Pokoknya dua-duanya beking ba ewe.... (selain bobo miring... hahahaahaaa)

GOHU  :

- Popaya tore-tore yang diiris bapanjang model rupa diatas

- Rica, Bawang Merah, Goraka... tumbu alus... (depe banyak mana-mana noh.. sesuai selera)

   Kalo suka boleh  tambahkan tarasi spanggal yang so dibakar dulu.... ato ada juga yang tambah deng ikang    Roa yang so dibakar juga kong tumbuk sama-sama... ato tambah deng bakasang sadiki... mana-mana          katu.

- Air masak, Cuka saguer ato cuka biasa

- Gula deng Garam secukupnya

Disajikan dingin-dingin segar pake es batu sadiki.... kong makang  pas ujang krass.... eh panas krass...
Dudu di dego-dego sei rumah kong pangge birman makang malendong... karna biasanya orang Manado kalo beking Gohu pasti satu loyang... :D 
Gohu memang paling enak kalo makang rame-rame sambil ba karlota... 
Jang talalu pedis... jang talalu asang karna Gohu  selain memicu Adrenalin.... yang pasti memicu Maag deng ciri gigi kalo talalu asang... haakakaakakk...

Mungkin itu sto kong dorang ja cumu tu istilah : "ngana pe nene gohu deng ngana"...  Entahlah.... シ シ


SATE  Ba' Rica  :

- Daging babi pilihan yang so iris-iris kong campur deng bumbu yang so kase alus.. ( terserah mo ditumbuk,     diblender.. ato dikunyah.. xixixi)

   Biasanya daging yang so diiris  so  langsung  di cucu-cucu deng tusukan sate.

- Bumbu yang kase alus itu adalah : Bawang merah, Bawang Putih, Goraka, Rica,  Garam... kase tono            didaging  sadiki lama sampe meresap...

  Kalo so cukup  meresap, daging sate bisa di kukus dulu baru bakar ato bisa juga langsung bakar di bara...     mana-mana yang penting masak bagus...

- Sementara bakar kong kipas-kipas ja siram minyak deng depe rica bakar... 

  Pokoknya ba asap-asap sampe di kampung sablah... :D

Oh Iyo.... kalo orang Manado/Minahasa depe Rica pasti nda cukup kalo cuma salah salah depe banya...

Biasanya ada depe Rica Bakar sendiri lepas disei Sate bakar kong makang sampe pica- pica suar... :D 

Ini Bahan Rica Bakar : 

- Rica, Goraka, Bawang Merah, kalau mau bisa tambah kamiri sadiki ato bawang putih sadiki
- Tumbuk alus, tambah  garam deng vitsin sadiki baru siram minyak kelapa panas  secukupnya... 
  ehh kase lebe sadiki kote  tu minya kelapa  for siram-siram pas tu  Sate sementara ja bakar.

Oh yaaa... 
Peringatan !!!
Sate Ba :  Haraaaammm !!.... 
*Haram kalo nda dimakan.... heheheheee...


Peace... ✌

"Tusa"

Kucing ato orang Manado ja bilang : Tusa... 😄
Binatang ini... eh hewan ini qt pe hewan peliharaan favorit selain Badak Bercula Satu deng Pok-pok Aer... :D  (bakusedu)
Dimasa kecil orang tua salalu larang torang banyak bermain Tusa ato pegang Tusa... karna tako torang kena Asma... memang ada benarnya noh... Mar salalu torang ja 'selundupkan' dikamar, sambunyi dibawah selimut.... 
Jangan sampe orang tua tau....
Yah memang nda dapa Asma.... pokoknya pe abis kase makan brudel spanggal kase minum susu... bermain main... ternyono dap...
Mar bangun pagi-pagi musti kerja bakti... karna so ada berkat diatas kapala  di sei bantal so ada tusa pe e'ee... so ta smer di rambu... Pantas mimpi jaha...
Pembalasan yang Sadis.....
Mar tetap nda kapok piara Tusa...
Menggemaskan... Lucu... 'innocent'  
Mar...  ternyata ada kote  fakta unik tentang ni Tusa ni dia  : 

1. Tusa kote boleh deteksi gempa bumi ato tanah goyang.
Sebelum tanah goyang  tu tusa mo ba sikap aneh, ternyata depe bagian bawah kaki yang ba bantal itu  ada saraf sensitif yang boleh ba deteksi getaran tanah goyang.
Jadi lia jo kalo tusa di rumah so ba aneh aneh... 

2. Tusa punya kemampuan memanipulasi.
Torang pernah rasa kalo tu tusa sama deng bermohon kalo mo minta makanan...
Tusa capat baadaptasi deng orang, dia ja beking diri  deng  depe suara dapa sayang kalo mo minta makanan... Tusa memang jago skali beking diri...xixixi

3. Tusa suka dipuji deng dielus (Kira leh cuma qt... hahahaa)
Ternyata Tusa lebe dengar-dengaran pa orang kalo di puji ato di elus elus.
Kalo mo latih Tusa ternyata dorang nda mangarti kalo mo hukum.. dorang lebe inga tu pujian  ato elusan.
Depe kata laeng ni tusa makang puji kote kong manja... wkwkwkwkwkk..

4. Tusa nemau ciong Bobou Jeruk ato Lemong
Ternyata Tusa binci skali bobou segar rupa jeruk ato lemong. Dorang mo menghindar kalo ada aroma bagitu... deng Tusa juga binci aroma Parfum... (belum tau eee kalo tusa suka ciong bobou ketek asang... nanti mo coba... akakakaakk)

5. Ada Tusa terkaya didunia
Tusa nama 'Tardar' sang Internet Celeb... depe penghasilan 200 juta dollar ato 2 trilyun rupiah.... oemjiiii....
lebe besar depe pendapatan daripada qt pe mantan dulu Christiano Ronaldo yang 'cuma 524' milyar rupiah....
Bagus ni Tardar tadampar di Manado kang.... kong bawa di Pasar Karombasan... hahahahaa... nda katu... 

Kadang Tusa orang ja gambarkan tentang  'kemunafikan' ... deng kalimat  : "Malo-malo Tusa"...
Depe muka yang super  innocent.. gerakan lembut gemulai... kadang diam...  pura-pura murung...  beking ngana nda sangka kalo dia yang ambe tu ikang diatas meja.... hahahaa

Berikut nama-nama kucing yang pernah "mengisi ta pe hidup" ... :
Sube
Naruto 
Sakura
Bold
Hope
Faith
Maniso
Boncel
Kaktus
Peanut
dll...

Apa ngana pe kucing pe nama dang?   ^_^ 




Meonggggg........ 

Orang Minahasa Pe Makanan

Bangga deng senang skali jadi orang Minahasa....
Kebahagiaan terbesar kalo pulang kampung... yaitu tu mo "makang besar"
Pokoknya abis dari pulang kampung badan melar entah brapa kilo... mar qt nya peduli...
Makang di daong pisang dapa rasa nikmat skali...
Makanan seadanya yang dimasak dengan penuh cinta.... oleh orang-orang tercinta...
Serasa jadi "Ratu"  dikampung ketika semua sudara-sudara memasak makanan yang spesial for  qt... hehee...
Satu lagi minuman favoritnya qt... "Saguer"... oh my.... segar..manis..asam... pokoknya enak skali kalo for qt...
Cocok skali makang dikobong kong nasi deng ubi di daong pisang... rica roa... weris...
Deng.....
Maaf neh yang Dog Lover..... ada juga "Ikan RW"
(Masih mending makang RW daripada tamang makang tamang kang.... ehehehee)